السلام عليكم طلاب الفرقة التانية في هذة الصفحة سوف تجد بها كل ماتحتاجة من معلومات عن السنة الدراسية التانية كاملة بكلية الهندسة الزراعية جامعة الازهر .
فيما يخص مواد الترم الاول والثاني والدكتور الخاص بكل مادة ونبذة مختصرة عنة وكيفية مذاكرة المادةقبل ما نبداء نتكلم علي نظام السنة هيكون ماشي ازاي احب اباركلك علي نجاحك في سنة اولي اياا كان التقديراللي انت جبتة او حتي معاك مادة اوتنين فالحمد للة علي كل شي. دا نصيبك وعلي قد تعبك السنة اللي فاتت بقيت في الوضع اللي انت فية.
واهم حاجه اكتسبتها من سنة اولي انك خلاص عديت مرحلة الطالب اللي موهوم من الكلية وخايف من التعامل من الدكاترة ومن كلامهم ومن حوارهات اسمك وخد ماينص (-5 او -10 ) اللي خصوصا بشمهندس ابراهيم كان بيعملة😂 وعرفت الامتحانات نظامها بيكون ماشي ازاى دلوقتي بقا احب اطمنك انك بقيت في تانية كلية هتقولي منا عارف😂
اقولك انك هتشوف السنادي تعامل مختلف تماما عن السنة اللي فات من جميع المعيدين والدكاترة وخصوصا بشمهندس ابراهيم اللي بيتحول من ممكن اكتر معيد متكونش مرتاح لة وحاسس انة بيرخم عليك حبيتين الي افضل معيد هتتعامل معاه بعد بشمهندس طه اللي هتتعامل معاة السنادي لاول مرة شخص هتحس انه خسارة في الكلية قسما باللة ربنا يباركلة في سعية ان المعلومة توصل لكل الطلاب بدون اي تكبر خلاصة الكلام دا كلة انك هتحب المعيدين السنادي انشاء اللة ومش هتحس بصعوبة في انك تتعامل مع اي حد في الكلية
نيجي بقا لمادة البشمهندس سلطان دايما هتلاقيها مادة رايقة زيه واللة في المادة دي بقا اقولك انك هتجيب امتياز وانت نايم في دارك
بقولك اية عارف فيزياء السنة اللي فاتت جزء الكهربية اللي فيها هو موجود معانا السنادي تحت مسمي هندسة كهربية بالاضافة
اولا مواد الكلية
مواد الترم الاول لكية الهندسة الزراعية الفرقة التانية
- هيدروليكا
- أراضي
- ديناميكا حرارية(ثيرمو)
- هندسة كهربية
- أوتوكاد
- إنشاءات
مواد الترم التاني لكية الهندسة الزراعية الفرقة التانية
- انتاج المحاصيل
- المعادلات التفاضلية
- نظرية الالات
- انتقال الحرارة والمادة
- البرمجة بالحاسب الالي
- لغة انجليزية
- تاريخ الخلفاء الراشدين
- قران كريم
مواد الترم الاول بالتفصيل
مبدائيا كدا السنادي اللي هتحدد فيها هتدخل قسم اية انشاء اللة فنركز من الاول ونحاول منفقدش درجات علي قد ماتقدر عشان تختار القسم اللي انت حابة باريحية ومينفرضش عليك قسم مش حابة بسبب لقدر اللة المجموع بتاعك فنركز حبتين تلاتة اربعة السنادي
- أراضي
زي ماعرفين اننا بناخد كل ترم مادة من كلية زراعة فالترم دا اراضي هي المادة بتاعتنا وعلي عكس النبات والاغذية اللي كانو اصعب المواد في الترم فالاراضي هتكون من المواد السهلة انشاء اللة مادة لذيذة في المحتوي العلمي بتاعها اللي بيتكلم عن (التربة ومكونتها وخصائصها وازاي تاخد عينة من التربة وتحللها وتتعرف علي صفاتها وكلام من هذا القبيل) من المواد اللي هتستمتع بيها وانت بتدرسها
مش محتاجين نقول توزيع الدرجات خلاص بيقينا عارفين اي مادة 40عملي و60نظري عدا الشرعي
ازاي بقا نجيب تقدير فيها انشاء اللة اولا كدا تحضر السكاشن وتذاكرها اول باول لانها مادة عاملة زي الدرسات عاوزة حفظ شوية
هتاخد امتحانين علي مدار الترم مثلا لو جبت في واحد4 والتاني 5 فا بيخدو درجة امتحان واحد بتكون الوسط مابينهم يعني 4.5 وفي امتحان في نص الترم دا بيترصد بمعرفة الدكتور وعندك الحضور 5 وتسليم الشيت5 ادا 20 درجة +20عملي وشفوي
بالنسبة للنظري فالمادة بناخد فيها 10 محاضرات 6 دكتور بيديهم و4 دكتور تاني اللي هما خاصيين بجزء الكمياء
الامتحان بيجي نص من 6محاضرات والنص التاني من جزء الكمياء
في اخر محاضرة للدكتورين بيديك نقاط مهمة تركز فيها دي بتكون الاسئلة الجديدة في الامتحان والباقي مبيخرجش عن امتحانات السنين اللي فاتت .مادة سهلة انشاء اللة متقلقش منها اهم حاجه الالتزام مع الدكتور في المحاضرة ويحضر عدد كافي المحاضرات بتاعتة عشان بيزعلو لما العدد اللي حاضر يكون قليل
رابط داتا المادة من هنا اضغط على CLICK HERE
-------------------------------------------------
- هيدروليكا
المحتوي العلمي للمادة (اجهزة قياس التصرفات المانومترات ومعادلة برنولي وجهاز الفينشوري والهدرات)بس كدا مادة تتلم كلها في 10 صفحات كلها تعويض مباشر.
حط القانون وعوض وخد الدرجة وروح.الدرجات اولا كدا مفيش درجات علي الحضور بتاخد امتحان اعمال سنة ب10 درجات وتسليم المذكرة10 وامتحان العملي 20 درجة مفيش اسهل من كدا
بالنسبة للنظرى فعلي ضمانتي ذاكر اخر4 امتحانات هتدخل الامتحان موجود منهم بالنص اخر 4 اصلا هتلاقيهم امتحان ونص ومتكرر الدكتور الامتحان بتاعة هدية عشان تجيب تقدير اقسم باللة
رابط داتا المادة من هنا اضغط على CLICK HERE
-------------------------------------------------
- ديناميكا حرارية(ثيرمو)
نقدر نقول عليها اصعب مادة الترم دا وزي مابيقول بشمهندس احمد حسين هتاخد السكشن هتلاقية سهل وانت فاهمة هتاخد التاني من غير ماتذاكر الاول هتلاقي الدنيا بداءات تصعب هتاخد التالت من غير متذاكر الاتنين اللي فاتو هتلاقي الدنيا معاك بقت طين حرفيا وهتيجي تذاكر اللي انت كنت فاهمة وحافظة وانت في السكشن هتحس انك بتقرا صيني ومنين بيودي علي فين😔 والدنيا بايظة
فنركز فيها من الاول عشان منتعبش فيها انشاء اللة المادة هتلاقيها تافهة حرفيا لو ذكرت اللي انت ختة في السكشن اول باول
بالنسبة للدرجات فبرضو مفيش درجات علي الغياب 10 امتحان اعمال سنة و10 مذكرة و20 امتحان عملي
و60النظري بيجي بالنص من المحاضرات اللي موجودة في الداتا عندك 8 محاضرات فيهم في حدود 16 مسائلة الامتحان مبيخرجش عنهم حرفيا وتابع قناة اليوتيوب هتلاقي فيها شرح كافي و وافي للمادة انشاء اللة هيسهل عليك المادة خالص انشاء اللة
رابط داتا المادة من هنا اضغط على CLICK HERE
-------------------------------------------------
- هندسة كهربية
لشوية من المغناطسية ودائرتين من دوار التيار المتردد بتوع الثانوي (الحثيية والسعوية) بس كدا هي دي المادة.
اه نسيت اقولك الجديد مسالة رفع مياة بس مادة سهلة جدا باقصي درجة
هتلاقي حتي بشمهندس ابراهيم مش راضي علي محتوي المادة 😂
معلومة كدا علي الماشي الدكتور اللي كان بيدي المادة توفاه اللة من سنتين وكان شديد جدا والمحتوي صعب جدا ونص الدفعة كانت بتشيل المادة من صعوبة الامتحان لكن مع دكتور محمد بدر بقيت تستوعب المادة والمادة مبقتش معقدة وبقت في المتناول بسهولة وبس علي امتحان السنة اللي فاتت هتلاقي نفسك عارف تحلة من غير ماتذاكر اصلا والامتحان مبيخرجش عن المحاضرات والمسائل في الامتحان بتيجي بالنص والارقام من المسائل اللي في المحاضرات
رابط داتا المادة من هنا اضغط على CLICK HERE
-------------------------------------------------
- أوتوكاد
بس ياغالي الكاد او الاوتوكاد عامل بالظبط كدا زي الحاسب الالي في السنة اللي فاتت متعرفش هو سهل ولا صعب لان طبيعي اي حد هيتعلم في برنامج اوي حاجه علي الكومبيوتر لازم تتعلم عملي وعلي الجهاز وتمتحن علي الجهاز مش ورقي ولكن في ظل الموجود هنتعامل انشاء اللة اولا كدا اي هو الاوتوكاد بس يارايق الكاد برنامج بتصصم بية الاشكال الهندسية كلها من شقق وبيوت وشبكات ري وصرف
واكيد سمعت عنه قبل كدا اولا قبل اي حاجه البرنامج سهل جدا جدا وحاول تتعلمه بشكل شخصي هيفيدك اكيد ولكن لو علي الكلية فاحنا بناخد الاساسيات بس يعني ازاي تمشي ايدك في البرنامج لاكتر ولا اقل.المعيد بشمهندس حسن متعاون جدا في حدود االلي يقدر علية والدكتور بردو بيشرح والامتحان بتاعة اغلبة متكرر وسهل 3 اسئلة اختر علي صح وغلط علي وصل 😂
بالنسبة للدرجات فبناخد 10 امتحان اعمال سنة و10 شفوي اللي هو بتجيب معاك لاب او من اي حد من زمايلك معاه لاب وبتدخلو تمتحنو مع البشمهندس حسن بيقولك مثلا ارسملي مستطيل وجواة دايرة بترسم وتروح تورية يقولك اية الاوامر اللي استخدمتها فيديك الدرجة ولو انت متعرفش حاجه خالص هيديك5 من 10 ولكن الافضل وانت بتمتحن معاه تروح لية بدري عشان اللي بيحل بسرعة هو دا اللي فاهم فبيديلة 9 وممكن عشرة كل ماتتاخر حتي لو راسم صح هتاخد 7 او 8 واخر حاجه 20 درجة علي امتحان العملي بيكون مع الشفوي .والنظري 60 درجة حل امتحانات السنين اللي فاتت مع حفظ الاوامر الاساسية هتلاقيهم 5 صفحات في الداتا هتقفل الامتحان انشاء اللة
رابط داتا المادة من هنا اضغط على CLICK HERE
-------------------------------------------------
- انشاءات
من المواد اللي المفروض تقيلة بس بفضل اللة ثم بشمهندس طة هتلاقيها اكتر مادة فاهمها وحاسس انها سهلة جدا ومش هقولك احضر السكاشن عشان تفهم انت من نفسك بمجرد انك تحضر سكشن واحد بس مع بشمهندس طة مش هتغيب ولا سكشن افضل معيد حرفيها لابيتكبر ولا بيشوف نفسة علي الطالب وبيعاملك اكنك اخوة الصغير حرفيا وخايف عليك وبيكلملك ازاي تاهل نفسك لسوق العمل وبينصحك كتير جدا جدا في الوقت اللي مبتلاقيش حد في الكلية كلها يتكلم معاك عن الكلية اساسا بالنسبة للمادة فالانشاءات اساس قسم منشئات وموجودة في قسم مدني كلية الهندسة اللي بناخدة فيها يعتبر اساسيات ورتوش بسيطة من المادة مع بشمهندس طة حرفيا مش هتحتاج حاجه في المادة لكن لازم تذاكر معاه اول باول توزيع الدرجات في العملي بناخد امتحانيين اعمال سنة كل واحد ب5 والشيت5 والحضور5 وامتحان العملي 20 والنظري 60 ونظام الامتحان ثابت 3 اسئلة الاول نظري عن (الاحمال-القوي-الركائز-الكميرات)
ومسائلة ردود افعل ومسائلة N.F.D-S.F.D-B.M.D
احضر مع بشمهندس طة ومتقلش من الامتحان سواء عملي او نظري
رابط داتا المادة من هنا اضغط على CLICK HERE
-------------------------------------------------
- مذكرة الامتحانات
زي مانت عرفت من امتحانات السنة اللي فاتت ان زي ماهم حاجه في الثانوي المراجعة وحل البوكليت هنا بقا حل الامتحانات
فنركز في الامتحانات لان اغلب المواد الاسئلة فيها مكررة بالنص من الامتحنات اللي فاتت
رابط داتا المادة من هنا اضغط على CLICK HERE
قبل ماندخل علي الترم التاني شكر خاص لبشمهندس طة💝
مواد الترم الثاني بالتفصيل
- المحاصيل
رابط داتا المادة من هنا اضغط على CLICK HERE
-------------------------------------------------
- معادلات تفاضلية
نيجي بقا للمادة اللي بناخدها من كلية علوم لكن المره دي الوضع هيختلف تماما هناخد المادة كلها عندنا في الكلية سواء محاضرات او سكاشن لان المعيد بيكون من عندنا في الكلية المادة بتتكلم عن المعادلات التفاضلية باختلاف انواعها ودرجتها مش بنتعمق فيها زيادة عن اللازم بمعني اصح لو كويس في الرياضة الماده كلها تقدر تذاكرها في10 ساعات المعادلات بالظبط عاملة زي مكعبات بتحفظ طريقة تركيبها علي بعض وبس الماده عبارة عن 8 محاضرات امتحان النظري حرفيا مبيخرجش عن المسائل اللي بتتشرح في المحاضرة واللي هي عبارة عن مسالتين او تلاته بالكتير في كل محاضره بالارقام كمان دا بالنسبة للنظري وبالنسبة للعملي (10 اعمال سنة ومذكرة و10 امتحان مدترم و20 امتحان عملي)يعتبر اتقل ماده في الترم دا لازم لازم تذاكرها اول باول والاااااااا هتغرق فيها
بمعني اصح لو حفظت 18 مسائلة بتوع المحاضرات هتقفل النظري بس الرياضة مبتتحفظش
محتوي السكاشن هو هو محتوي المحاضرات
رابط داتا المادة من هنا اضغط على CLICK HERE
-------------------------------------------------
- نظرية الالات
مادة بسيطه جدا جدا عبارة عن فهم كيفية عمل المكانزم وشرح الحركة المركبة والدورانية وبعض التطبيقات وكيفية رسم التطبيقات دي في لوح زي الرسم الهندسي كدا (مادة مهمة جدا جدا للي ناوي يدخل قوي والالات)لانها المادة الاساسية للقسم مادة تتلم في 4 ساعات بدون مبالغة الدكتور محترم جدا جدا والامتحان ثابت من اخر3 سنين وبالنسبة للعملي (20 اعمال سنه وتسليم لوح الرسم+20امتحان عملي ) الداتا هتفيدك جدا وفي شرح للتطبيقات دي كلها علي اليوتيوب تقدر تبحث عن مثلا الحركه الدورانية هتلاقي شروحات كتيرة
رابط داتا المادة من هنا اضغط على CLICK HERE
-------------------------------------------------
- انتقال الحرارة والمادة
عارف انت وانت قاعد في البلكونة في عز الشتاء وعامل لنفسك كوب قهوة وقاعد في ريحة المطر وماسك كوب القهوة في ايدك عشان تتدفي والحرارة تنتقل من الكوب ليد معاليك اهو انت بقا يباشا هتتدرس انتقال الحرارة دا ازاي بيتم وهم كدا انتقال حرارة (بالحمل-بالتوصيل-بالاشعاش )بس كدا حاجه كدا زي الديناميكا الحرارة بس اهدي منها تلات او اربع حبات كدا كفاية ان دكتور احمد صلاح هو اللي بيديها اكيد انت فاهمني امتحانة مبيخرجش عن المحاضرات ومبيخرجش عن امتحانات الاعوام السابقة وبالنسبة للعملي (10اعمال سنة و10 امتحان ميد و20 امتحان العملي) عملي المادة اتقل من النظري سيكا
رابط داتا المادة من هنا اضغط على CLICK HERE
-------------------------------------------------
- البرمجة بالحاسب الالي
اكيد انت عارف نظام مواد الحاسب ماشية ازاي مش هنحتاج نتكلم كتير لاننا اتكلمنا باستفاضة فيها اللي هتدرسة بس هو برنامج فيجوال بيزيك( visual Basic ) وبتتكلم في اكواد بسيطة جدا جدا زي ازاي تعمل الة حاسبة وازاي تعمل نظام نتيجه تدخل اسم الطالب يطلع ليك التقدير سواء جيد او جيد جدا او امتياز والنسبة المئوية(67-70-81.5-85-94.5) وبس كدا ممكن تتعلمهم من دلوقتي مش هياخدو معاك وقت خالص الامتحان بسيط جدا سواء في العملي او النظري تقدر تلمهم في ساعتين قبل الامتحانات بس ماتوصلش نفسك لكدا الداتا هتساعدك جدا وخصوصا في النظري
رابط داتا المادة من هنا اضغط على CLICK HERE
-------------------------------------------------
- اللغة الانجليزية
اشتري الكتاب والمذكرة هتاخد اسئلة بيجي منها الامتحان بس كدا المادة كلها مع الدكتور ب100 درجة الامتياز مضمون انشاء الله بس الاحترام المتبادل مع الدكتور اهم من اي حاجه
رابط داتا المادة من هنا اضغط على CLICK HERE
-------------------------------------------------
- تاريخ الخلفاء الراشدين
من اسم المادة بنتكلم عن الخلفاء الراشدين رضي الله عنهم من مولدهم وحياتهم وبعض اعمالهم ووفاتهم او استشهادهم (ابو بكر وعمر وعثمان) مادة امتياز مذاكرة ليلة الامتحان
رابط داتا المادة من هنا اضغط على CLICK HERE
-------------------------------------------------
- القران الكريم
المقرر من اول اخر ربع في سورة الكنعبوت من قولة تعالي( ولا تجدلو اهل الكتب) الي سورة الجاثية
- مذكرة الامتحانات الفرقة الثانية كلية الهندسة الزراعية
زي ما انت عرفت من امتحانات السنة اللي فاتت ان زي ما اهم حاجه في الثانوي المراجعة وحل البوكليت هنا بقا حل الامتحانات
فنركز في الامتحانات لان اغلب المواد الاسئلة فيها مكررة بالنص من الامتحنات اللي فاتت
رابط داتا المادة من هنا اضغط على CLICK HERE
وفي النهاية اهتم بدراستك وطور من مهاراتك وحسن مستواك الدراسي والشخصي واخلاقك واهتم بصلاتك وتوكل علي الله وتأكد أن الله لا يضيع أجر من أحسن عملا.
تمت الكتابة بواسطة م- عبدالرحمن ياسر
للتواصل عبر Linkedin من هنا
تعليقات